Liebi Chinderseel...
Ich weiss nöd, was uf dere Welt passiert isch. Ich weiss au nöd, wenn mir Erwachsene de Moment verpasst händ und dermasse falsch abboge sind. Glaub mir aber eis, mini wundervolli Chinderseel, ganz viel Mensche sind dra, die Fehler uf irgend ei Art wieder z'behebe.
Mini wunderschön Chinderseel, ich weiss, eu wird so viel atah. Mer laht inzwüsche komischi Gstalte uf eu los, wo euch eifach de totali Schwachsinn lehred. Mer bringt eu bii, dass s'Lebe a dem ecklige viereckige Ding ablauft und laht eu vergesse, wer ihr würkli sind. Für dich, mini wundervoll Chinderseel, isch das viellicht chum vorstellbar, aber die Erwachsene wo jetzt für euch kämpfed, sind ohni irgend es viereckigs digitals Ding ufgwachse. Mir händ die Freiheit no gah, dass mer i de Natur händ dörfe ufwachse, mir händ dörfe dreckig werde, mer sind sogar au ab und zu mitere Gripp im Bett glege. Das alles isch so normal gsi für eus. Eusi Eltere händ sogar welle, dass mer es Grippli verwütsched, es hät nämlich euses Immunsystem g'stärkt. Und wie du gsehsch mini wundervolli Chinderseel, mir händs überlebt. Keine hät eus igredet, mir chöntet e Gfahr für irgendöpper anderscht sii.
Mir tuet s'Herzli weh, wenn ich mir vorstelle, wellem Wahnsinn ihr all usgsetzt sind - und doch weckts tüüf i mir inne de Kampfgeist. Mir und vielne anderne. Mir versueched nämli die Welt irgendwie wieder in Ordnig z'bringe, für das sind mir nämlich da.
Mini wundervolli Chinderseel, mir händ frühener ide Schuel glernt, dass es Wiibli und Männli git. Bi de Mänsche, bi de Tierli und au bi de Pflanze. Alles, wo lebt isch wiiblich oder männlich. Da gits nüd dezwüsche. Egal, wer öppis anders behauptet ufgrund irgend einere Theorie. Ich nänns absichtlich Theorie mini lieb Chinderseel, damit ich dich nöd no meh verwirre. Mir händ frühener glernt, dass s'Mami es Baby im Buuch hät. Mer händ am Buuch dörfe go lose wie das chline Herzli schlat und eusi Händ druf lege, selber g'spüre, dass da es Lebe isch. Mir hättet eus damals niemals chöne vorstelle, dass euse Papi es Baby im Buuch hät. Wenn en Papi en Buuch gah hät, denn meischtens wegem Bier ;-)
Mir sind ufgwachse im Glaube, dass es zwei Gschlächter git. Und eu bringt mer hüt bi, mer händ 27, oder 38, oder 56... was au immer. Nei mini wundervolli Chinderseel, es git würkli nur zwei. Lueg mal weg vo dem viereckige blöde Bildschirm, lueg mal usse id Natur. Oder lueg mal dis Huustierli a. Dis Büsi oder din Hund dänkt nöd ei Sekunde dra, was es isch... wil es isch eifach und es akzeptiert sis Gschlächt. Bi mine Büsi's isch das so. Sogar mis Schildchrötli dänkt nöd dra, es wär lieber es Wiibli. Viellicht isch de Rambolino darum so i mich verliebt, will er es Männli isch und ich ebe halt es Wiibli.
Viellicht chasch du dir das nöd vorstelle, aber mir sind frühener im Sandchaste g'höckled, händ Sandchueche "bache" und de sogar g'mampft. Und lueg, mir lebed alli no. Mir sind dur d'Pfüze g'sprunge, patsch nass simer gsi... Mer händ die wundervolle Schnägge beobachtet, sie über eusi Händ chrüüche la... mir sind im Wald go spure lese, go Blätter sammle, ja sogar amel au ufem Buurehof go ushelfe. Mir händ Gummitwist gspielt, Räuber und Poli, Versteckis, Fangis... Mir sind die meisti Zyt dusse gsi, egal bi wellem Wetter.
Mir händ Brieffründschafte gah. Je meh, desto besser. All eusi Ziilene hämer vo Hand verfasst, s'Briefli verziert und teilwiis sogar s'Couvert. Wemer usse sind, simer bi eusne Gspänli go lüüte, da hämer nöd eifach per Handy e Nachricht verfasst. Das chamer sich hüt nüm vorstelle, ich weiss. Aber lueg, mir sind frei gsi vo all dem, mir sind bi eus gsi, frei vo Ängst und Zwäng. Frei vo falschem Glaube, frei vonere verchehrte Welt.
Mini wundervolli Chinderseel, mir Herzmensche schaffed mit aller Kraft dra, dir wieder e besseri Welt chöne z'büüte. Mir isch das so e Herzensaglegeheit - mir und vielne anderne Lüüchttürmli.
Ich umarme dich mini wundervolli Chinderseel - us tüüüfster wahrer Liebi.
Dini SteFunny von Llamour