Liebi Mummelä...
Vorher han ich grad zum Fenster usse gügsled und gseh wie d'Schneeflöckli wieder afanged tänzle mitenand. S'Toggeburg liet untere traumhafte Schneedecki, es richtigs Winter- Wonderland dörf ich da i volle Züüg gnüüsse. Es chönti mir nöd besser gah...
Ich gang ja eigentlich immer recht sarkastisch dur mis Lebä durre, mit viel Witz und Charme. Allerdings leg ich für en chline Moment mis Satire- Mänteli ab und schrieb dir Mami nach so langer Zyt mal wieder us mim tüüüfstä, tüüüfstä Herze usse.
Das Jahr isch es bereits die vierzehnti Wiehnachte wo mir nöd mitenand verbringe dörfed, wil so vieles zwüsched eus staht. So viel Stolz und Stuurheit, so viel Ungseits, so viel Falsches gseit. So viel unterdrückti Umarmige und liebevolli Wort. 14 langi Jahr wo mir eifach d'Liebi füreanand ufd Siite gleit händ und id Rolle vonere starke Frau inne grutscht sind und nüm händ welle Schwächi zeige.
Nach all dene Jahr, wo ich eifach ha welle verstah und immer
nach de Antworte uf mis WARUM gsuecht han,
han ichs hüt endlich begriffe.
Weisch Mami, ich ha paar Mal i de Vergangeheit a dich denkt und mich immer wieder gfrögt, warum häsch du das gmacht? Oder au: warum häsch du mich nöd chöne so lieb ha wie ich mir das us tüüfstem Herze gwünscht han? Warum bisch nöd bi mir gsi, vorallem i dene Situatione, wo ich dich am meischte bruucht han? Wieso bisch immer ab und häsch mich zrugg lah?
Es hät furchtbari Wundene hinterla und die tüend au hüt no sehr weh. Ich ha mich i de vergangene Jahre so sehr nachere liebevolle Umarmig vo dir g'sehnt. Eifach vo mim Mami in Arm gno z'werde und z'gspüre, dass du mich eifach lieb häsch, so wie ich bin. Wil ich bin guet und gnueg so wie ich bin.
Aber wie chan ich vo dir öppis wünsche, wo du selber nie häsch dörfe kennelerne. Bitte verzeih mir, dass ich so lang bruucht han bis ich das kapiert ha und en chline Egoismus an Tag gleit ha. Hüt isch mir das 20erli abe. Und ich weiss au, dass du mit grösster Wahrschinlichkeit doch dis Beschte versuecht häsch zgäh - au wenn ichs absolut nöd als Beschtes aluege. Aber du häschs sicher probiert. Und du häsch dini eigene Kämpf müesse füehre und muesch es viellicht au hüt no. Ich weiss au jetzt, dass du wahrschinlich als chlises Meitli de glich Wunsch gah häsch wie ich: ES MAMI, wo dich umarmt hetti, eis wo dir gseit hetti das sie dich so fescht lieb hät und immer für dich da gsi wäri. Aber dis Mami hät dir das ebe au nöd chöne gäh. Und so hät sich das dur de ganzi Familiestammbaum zoge... bis zu mir. Ich ha das alte komische Muster bi minere Tochter durchbroche. Ich nimm sie so oft wie ich cha in Arm, säg ihre wie fescht das ich sie liebe und sie weiss, ich bin immer für sie da. Egal, was es isch. Wil sie isch mis allergröschti Gschänk und das dörf und söt sie au wüsse. Sie isch guet und gnueg so wie sie isch.
Mami, weisch welles Bild han ich vor Auge, wenn ich zrugg a dich dänke? Genau das, wo du mich als Baby no liebevoll a dich ane druckt häsch, mit dine Lippe a mim chline Chöpfli. Det strahlsch du die absoluti puri Muetterliebi us... an e anderi Umarmig vo dir mag ich mich nüm erinnere. Aber das Bild Mami, das isch tüüf i mim Herze ibrennt. Und wenn ich a die Foti dänke, gspür ich dich ganz nööch bi mir. Dini Wärmi und ich fühle mich für en Moment extrem geborge und gliebt vo dir. Und genau is sottige Moment vermiss ich dich... und doch vertrau ich druf, dass alles so chunt im Lebe wie es ebe söt cho. Wil tüüf i mim Herzli gspür ich, dass e Muetterliebe nie ganz stirbt. Mängisch flackered sie nüm so fescht, aber erlösche wird sie nie. Wie die Verbindig zu dir... sie isch abgflacht, doch sterbe wird sie NIEMALS Mami. Und da cha no so vieles zwüsched eus stah... Eusi Liebi zunenand cha nie ganz sterbe, sie wird immer blibe.
Nach so langer Zyt han ich jetzt verstande, dass au du i dir inne es verletzts chlises Meitli bisch wo eigentlich eifach e liebevolli Umarmig brüüchti, öpper wo dich bedingigslos liebt. Öpper wo dich nimmt wie du bisch, wil au du bisch guet und gnueg wie du bisch Mami... Und ich weiss, au du häschs absolut nöd eifach gah und häsch dir bestimmt öpper a dinere Siite gwünscht wo du dich eifach hätsch chöne gah la, dich higäh so wie du bisch. Gliebt zwerde wie du bisch ohni wenn und aber...
Ja Mami, da cha no so vieles zwüsched eus stah, weg dem lieb ich dich trotzdem immer no... meh den je, bedingigsloser den je und ohni wenn und aber. Du bisch und bliibsch nämlich MIS MAMI! Und tüüf i mir inne druck ich genau i dem Moment mis chline Chöpfli wieder a dini Lippe und chlau en zärtliche Kuss vo dir. So wie uf dem schwarz wiis Foti.
Mami, heb Sorg zu dir und dim innere verletzte Meiteli. Du weisch, ich lieb dich und wird dich immer liebe. Und wer weiss, eines Tages viellicht... viellicht aber au nöd. Doch i eusem Herzli simer verbuunde.
Merry Christmas mis wundervolle Mami.
In tüüfster Liebi, dis Stiefeli