#sorrygäll, ich ha mir aso hüt ernsthaft vorgno, einisch mal nöd z‘stänkerle. Eifach wil Mäntig isch. Aber… ich bi ebe cheibe guet i dem, dass ich mich a mini eigete Sache halte.
Janu… Hani hüt mal wieder chli gschnädderlet, mit mim junge Herzmänsch. Da hani doch als Mami mit ihre so philosophiert über das aktuelle Weltgscheh. Ey Caramba nomale. Da machts i mim Chöpfli Klick und mir sind wieder mal 20erli abepurzled. #sorrygäll, wie immer halt.
Vor es paar Jahr händ mir doch mal die cheibe Sexismus Debatte i eusem schöne Schwizer Ländle gah. Huuuch… ja. Das Ganzi isch dänn so wiit us g‘artet, dass d‘Manne sich teilwiis nöd mal meh getraued, anere Frau es Kompliment z‘mache. Das d‘Manne nüm händ welle ellei mitere Frau imene Büro sii. Es chönti ja siii… #sorrygäll, ja es chönt würklich si. Aber mer hät d‘Manne mal einisch meh ufs Abstellgleis gstellt und die Spaltig vora triibä. Wil es sind NÖD ALLI Manne so. Und im Übrige sind au nöd all Fraue so durre bi rot.
Manne, churzi Notiz am Rande: MIR FRAUE HÄND IMMER NO GERN KOMPLIMENT UND MIR GHÖREDS SEHR GERN. Es schmeichlet eusem Herzli. Also hopp hopp, mached eune Liebste chli meh Kompliment, Mir stönd druf. #sorrygäll, hani hurti müesse erwähne.
Aber bitte verwechsled d‘Fraue nöd mit Feministinne. Isch dänn nöd ganz s‘gliche. #sorrygäll, da gits dänn es paar Unterschiede… Und da drüber wird ich dänn scho no philosophiere.
Kompliment mache, flirte, sich gegesiitig im Usgang amache (ussert es sind aso dämlichi Sprüch wie: bisch du no Jungfrau? Hani aso au scho ghört), sind eigentlich schöni Sache. Und es hät nüd mit sexueller Belästigung z‘tue. So en Hafächäs mal wieder. Aber echt. Wer scho mal sexuell belästigt worde isch, kännt so de Unterschied. Und ich red aso dänn au us Erfahrig. Und trotzdem stahn ich no hüt no uf Kompliment, #sorrygäll aber au. Öppis stimmt aso würklich nöd mit mir.
Wichtig isch eifach, dass wemer e sexuelli, wahri sexuelli Belästigung mit agseht, dass mer als Usserstehende igrifft und nöd so wie bi mir damals all im Schuelhuus eifach zuegluegt händ. #sorrygäll, ebe halt usem Busch chunt und nöd uf de nächst Termin fürs Augebraue zupfe wartet.
Guet, wiiter im Text. Jetzt chumi halt scho wieder mit dem Genderwischiwaschi hinte füre. Unisex- Toilettene a Schuele, i Restaurant’s und und und… Hmmm… Irgendwie chli unlogisch das Ganzi - aso mal für mich halt wieder, #sorrygäll.
Mer macht vor Jahre e Sexismus - Debatte und jetzt Unisex- WC’s? Klar, gnau min Humor.
Wie gsehts dänn so us mit Gmischte Garderobene i Fitness- Center oder Halle- und Freibäder? Aber d‘Chind findets ja angeblich lässig. #sorrygäll, eifach nur Bullshit das Gegegendere…
Ich weiss aso nonig, wie ich reagiere wird, wenn dänn en Maa ufs Fraue- WC chunt, wil er sich hüt ebe grad sooooo wiiblich fühlt. Aber wemers ja ganz gnau nähmtet, würd das denn ebe unter sexuelli Belästigung gah… aber mir sind halt ide Schwiz… da nähmemers halt amel nöd soooooo gnau, #sorrygäll.
Absgeh devo, wie häts de George Orwell gnännt? Neusprech! Upsi… söt mer dänn eigentlich kein Verglich zie, segi unartig oder so. ABER: ich bin halt ebe bizeli unartig, #sorrygäll. Zum Glück tüend sich ja nöd all öppis neus aeigne und blibet frisch und fröhlich bi… ja nennemers doch eifach mal ALTSPRECH.
Für hüt hani ausgeplappert. Und morn bin ich würkli mal chli still. Wil dänn gang ich uf Reise - aber nöd dur die mediali Landschaft.
SteFunny von Llamour
SHE. Punkt!