Vieli händ dänkt, d'Bundestochter Stefanie hät Verschwundibus gmacht. Nenei... ich bin immer da gsi, ha mir aber e fetti Uszyt gönnt. Beobachtet, glernt, analysiert (<- liet irgendwie a mim Sternzeiche oder so), mich erholt, vieles hät sich i mim Privatlebe g'änderet. Ich ha Plän, sehr vieli sogar und endlich weiss au ich, was ich eigentlich will und vorallem was ich ebe nüme will. Cheibe Prozess gsi. Sicher isch, ich cha nöd ohni mini Schriberei. Diejenige, wo mich vo de Schuelzyt no känned, wüssed jetzt no, mich häts nie ohni Stift und Papier gäh. Tja #sorrygäll, da bin ich halt wieder mit minere endlose Frögerei.
Ich schrieb, wie mir de Schnabbel gwachse isch... halt uf Züri- Dütsch, #sorrygäll. Aber so gahts für mich eifacher und abgseh devo, entferned mir eus ja immer meh vo kulturelle Aeignige. Somit dörf ich mich au vom glernte Schriftdüütsch distanziere. Hät mer mir sowieso immer welle uf Bräche und Büüge itrichtere...
Huuch ja, die lässigi kulturelli Aeignige. Unter dem wunderbare und lässige Deckmänteli Rassismus. Winnetou? Echt jetzt Mänsche? Wer chunt überhaupt uf so e Idee das als so en Seich go deklariere und dänn so es Hafächäs go drus mache? Ich känn d'Antworte scho vo vielne und ich bi mir im Klare, dass alles schön nach ihrem sogenannte Plan lauft. Aber ich frög mich ernsthaft, wer macht bi somene Seich überhaupt no mit? Was isch mit em Geronimo? Stricht mer de jetzt au zu de Gschicht usse? Dörfed mir no go e Pizza esse oder tüend mir da eus kulturell öppis aeigne? Tailändisch choche Diheime? De komerzielli Scheiss übernäh vo de Amis? All das isch dänn keis Problem, immerhin isch mer dänn ja en Trendsetter. Aber jetzt de Winnetou welle eus go striitig mache... Ernsthaf? Wämer dänn nöd viellicht vorher bi dene wundervolle Walt- Disney Film afange? Was für en kulturelle Scheiss hämer echt eus durch dene ihri unterschwellige Botschafte ageignet? Was isch mit de chline Häx? Oooooh gföhrlich... Hex- hex!
Vo dere aktuelle Identitätskrisene mal abgseh. Wobii au da bini langsam chli verwirrt und mis Chöpfli spielt mir en Streich. Was zum Geier nomal bin ich i de hütige Gsellschaft? E Frau, imne Frauekörper, wo sich extrem wiiblich fühlt und uf Manne staht? Wie nännt mer das ide hütige Zyt? Heiterebeck nomal... #sorrygäll aber au!
Ich bin kein Mannefeind... oder wie mers hüt korrekterwiis schriebe würd: kei Mannefeindin (so en Bullshit aber au). Nei, im Gegeteil. Ich find d'Manne an und für sich super. Ich bin en Fan vo de Manne. Ich mag d'Manne und ich ha sie würklich sehr gern um mich ume. Das isch immer scho so gsi. Irgendwie han ichs eifach immer scho besser chöne mit ihne als mit mine wiibliche Zytgenossine. Aber ich dänke, die Thematik griff ich imne anderne Blog- Biitrag uf. #sorrygäll, hüt blib ich bi de Manne. Wobii wenn ich so drüber nah denke, gits au über die wundervolle Manne mehreri Biiträg.
Wenn ich ad Manne dänke, stell ich mir en starke Chrieger vor, wo d'Fraue und d'Chind mit allem mögliche beschützed. Egal, welli Gfahr droht, sie stönd schützend vor eusane. Grrrr... de Gedanke isch würklich sexy, heiss und atörnend. Sie sind i ihrere männliche, uf ihri spezielli dominanti Art so unglaublich stark und erotisch.
Flääätsch und ich lande wieder uf em Bode vo de Tatsache. Poof und mini Traumwelt hät sich ine Weichspüeler- Realität verwandelt. Ich lueg ume und was gsehn ich? Nur no wenig sexy Chrieger, wo eus Fraue und Chinder würdet beschütze. Wo sind die wahre Manne ane verschwunde? Die luutstarke EIDGENOSSE? #sorrygäll, muess ich die jetzt ide Fraueabteilig go sueche? Bi de vegane Kosmetikartikel? Wo zum Geier nomale sind ihr???
BITTE
zeiged euch ändlich wieder und chömed zum Busch usse.
#sorrygäll, suscht endets so, dass mir Fraue mit de Bratpfanne ad Front müend während d'Manne (nöd all, wohlverstande) ihri Augebraue gönd go zupfe la! Echt jetzt? Würd mer das dänn nöd au kulturelli Aeignig nänne?
Manne,
mir Fraue findet euch würklich attraktiver wenner verschwitzt am chnuste sind, anstatt mit eus über Nagellack und Frisure tüend diskutiere. Alles anderi isch im Fall Wischiwaschi und en Hafächäs, #sorrygäll.
Und ja Manne, mir Fraue sind stark, also mal die einte. Aber wänd mir überhaupt immer die Starke sii? Wänd mir echt nöd eus eifach mal chöne higäh, eus falle la? Eusi Schwächene chöne zeige, mal eifach bi eu im Arm sii und brüelle, wil mir mängisch au nüm möged?!
Und Fraue: Mir sind würklich stark. Aber mir müends de Manne im Fall nöd immer unter d'Nase riibe... #sorrygäll!
Und die elendi Spalterei die ganz Zyt zwüsche MÄNNLI & WIIBLI. Aso echt. Ich mach da eifach nöd mit. Ich find das furchtbar. Und ich gestah, euch Manne hät mers aso au nöd eifach gmacht. Ich ziehn vor jedem einzelne wahre Chrieger (hey und da meini denn nöd Soldate!) min Huet. Immer die Erwartige siitens vo Fraue.... oooooh, ich schüttle min Chopf mal wieder, #sorrygäll. Ich wird versueche, de Chopfschüttlerismus nüm so viel zelebriere.
Für hüt isch das alles gsi. Ich chume aber wieder und dänn versuech ich mal chli die Tabuthemene z'breche... halt ebe so, wie mir de Schnabbel gwachse isch, #sorrygäll. (Aber z'erscht jetzt das Buech vom Bundespapi. Das isch denn e Büez!)
https://wortakrobatin.webador.ch/sorrygaell-bundespapi
Und nomal: ICH FIND EU MANNE WÜRKLICH DE HAMMER - nöd all. Aber unter eu gits so hammermässigi, lässigi, liebevolli Type - und euch find ich Weltklass. Das muess eifach au mal gseit sii...
Sei ein Winnetou - und kein Waschlappen!
Sind lieb zunendand, öb Männli oder Wiibli ;-)
Bis bald, SteFunny von Llamour